JENNENG: Babine' ngodha badha e gir sereng Polo Gili Labak. (Foto Faris Sofyan Ashari). |
KABUPATEN Songennep gadhuwan bannya’ polo. Salaen Polo
Giliyang, Kacamadan Dungkek, se ampon eatorragi dhalem eccaban sabelumma, gi’
badha atosan polo. Badha 126 polo sae se ekennengnge otaba bunten.
Pramela dhari ka’dhinto, ta’ kasambu’ pole manabi
kabupaten paneka gadhuwan paanaban asre. Tantona paneka ngonjang pangaterro
oreng bannya’ kaangguy nojju Songennep. Sae dhari dhalem Indonesia dibi’ tor
oreng mancanagara.
Polo Gili Labak sala settong kennengngan wisata alam
se bannya’ eentare oreng. Sabban are paste badha oreng se entara ka polo
pakena. Bi-lebbi manabi kalerressan pananggalan mera otaba parai.
Acara administrasi, polo paneka masok Disa Kombang,
Kacamadan Talango. Polo paneka badha e antara Polo Poterran sareng Polo
Giligenteng. Kaangguy tanduk ka polo paneka gampang.
Monggu reng
lowar, lebat Terminal Arya Wiraraja otaba netene bus kantos Kalianget. Dhari
Kalianget netene tongkang nojju Palabbuwan Talango ra-kera coma sapolo kantos
lema bellas mennit.
Dhari Talango
nojju Kampong Lembana Bara', Disa Kombang e ponca termorra Polo Poteran. Abittepon ra-kera saparapat jam kantos dhupolo mennit.
Monnu dha' se abakta sapedha motor otaba ekkol, sae epatoro' e comppo'na
margasare.
LEBUR: Ngangodhadan adhang-ngendhang e gir sereng Polo Gili Labak (Foto Faris Sofyan Ashari) |
Saterrossepon,
dhari kampong paneka netene sampan. Ongkossepon agumantong rembak kalaban oreng
se gadhuwan sampan. Tamaso' ponapa bakal tolak dhaksakala otaba badhi ngenep,
saengga menta kone'e kalagguwanna. Nangeng, se ampon kajalanan ongkossa sampan
manabi nebbas antara Rp 300.000 kantos Rp 600.000.
Badha juga se
ngongkos kalaban metong cethak otaba bannya'na oreng. Manabi ta’ lebada Kampong Lembana, para maos juga bisa nojju dhari Palabbuwan
Kalianget. Dhari palabbuwan peneka bisa nebbas sampanna pajurung nojju Polo
Gili Labak.
Osso'na dhalem
sasampan agumantong rajana sampan. Ongkossepon juga sapaneka. Nangeng, se ampon
kajalanan antara Rp 300.000 kantos Rp 600.000.
Napa leburra
ajar-kalanjar ka Polo Gili Labak? Tanto bisaos gadhuwan kalebbiyan etembang
polo laen. E polo paneka cuma ekennengnga korang-langkong
35 soma (KK) kalaban 105 oreng.
Polo paneka cuma ne'-kene'. Lebarrepon ra-kera coma
lema kilometer.
Daddi maske coma
ajalan soko tanto kellar medderri polo paneka. Abittepon
ra-kera coma 20-30 mennit. Dhalem kakandha’an, oreng nyebbut lanjangnga polo
coma padhana roko’ salencer. Aponapa? Sabab, abidda alengleng otaba mederri
polo paneka epadha’agi sareng oreng aroko’ salencer.
Aeng tase’
polo paneka ce' jennengnga. Polana kajennenganna aengngan, bato
karang e dhalem tase'na etangala ce’ pasdana.
Sabatara, karang se badha gi' bannya' se butto. Salaen paneka, baddhi otaba
paser e gir sereng ngampar kalaban barna se pote. Tantona, kalaban paanaban
paneka maperna reng-oreng se entar.
Pramela, oreng
se entar ka polo paneka ngeba baragat kaangguy alangngpoy. Umummepon reng-oreng paneka apoto e man-kandhimma kennengngan. Salaen
paneka, oreng se dhateng ka polo paneka kaangguy nalektegi hal
alam yang gi’ ta’ rosak (alami).
LEPPOS: Ban-paraban acebbung e gir sereng Polo Gili Labak (Foto Faris Sofyan Ashari) |
Margasare e polo
paneka lebur nemmone oreng se dhateng. Pan-saponana jajanan disa otaba tambul
bisa epadaddhi teddha'an. Nangeng, margasare polo paneka sabban taon ngadhebbi
kasossa'an. Otamana bila ampon maso' mosem panemor. Bi-lebbi bila nemor kara. Kasossa'an
polana sara kaangguy ngaolle aeng berse.
Pramelan
margasare madhateng dari daratan Polo Poterran. Badha se ngobange butolan, galonan, badha jugan se nyello' ka somor. Reng-oreng madhateng dari Kampong Lembana. Badha jugan se madhateng dhari Disa Cabbiya, e Polo
Poterran jugan.
Sarana ngaolle
aeng berse tanto nambai kabutowan. Nangeng, reng-oreng paggun betta e polo
paneka. Lantaran
sara aeng, bila nembara’ asadhiya baddha raja. Tojjuwannepon tadha’ laen
kaangguy nadhai aeng ojan. Aeng paneka eangguy bila mosem penemor.
Banne pera’ aeng se madhateng
dari daradan Polos Poeteran. Tape juga, berras, tor kabutowan laenna. Marga
sare polo paneka agantongagi pangorebanna ka hasel tase’. Sae kalaban majang,
ajurung otaba manceng. Sebatara, pamengkang kaangguy atatamen coma pe’-cope’.
Se badha, bungkana nyeyor tor palembang.
E polo paneka tadha SD. Se badha
madrasa diniyah (MD). Tadha’ roma sake’ maske gun coma puskesmas pembantu (pustu). Salaen paneka, masjid di polo paneka
coma settong.
Nangeng, maske bannya’ kakorangan
margasare epolo paggun perna. Bi-lebbi, polo paneka daddi tojjuwan bannya’
oreng kaangguy arekreasi. Napa pole pemerintah bakal madaddi Polo Gili Labak
memangka sala settong objek pariwisata.
(Lukman
Hakim AG.)
Tidak ada komentar:
Posting Komentar