CARPAN HASMIDI*
Sabulan
sabelluna nyambelli
LALAKE’ se
atabu’ jidhut rowa buru dhateng dhari teggal. Sambi
ngeret tampar se etale’e ka
le’erra embi’ kebas obuwanna se ella olle lema bulan. Sabbanna, neng
pasar ta’ daddi se nola’a oreng bine’ dhateng ka adha’na
bakto toju’ nyandhar ka sasakana
barung kaldhu.
Aba’na takerjat bakto jareya. Buru
nemmo oreng bine’ nengteng
embi’ ka pasar kadibi’an laju nyander ka
adha’na. Oreng se badha neng e seddi’na padha ngabas kakabbi.
Dhimma oreng reya
se kennal ka sengko’? Bila bai
se nangale ka sengko’ ma’ laju nyander ka adha’an? Erekenne
sengko’ reya sapana?
Bakto jareya, sengko’
ta’ noro’ ka pasar. Sabelluna lakar eajak kaangguy ngancae.
Asabab sengko’ repot ban ta’ kaburu
kaangguy noro’. Saenggana lalake’
se daddi tatangga neng roma ajalan kadibi’ nojju ka pasar se badha neng
kampongnga. Laggu, satengngana
ngeret panas sajan santa’, gan sakone’ abintallagi ojang se abiter noro’e
biriyanna bulu-bulu alos se tombu neng kole’na.
Ngabiru dhadhaunan alembay-lembay
ce’ lemmessa. Angen se ngeba ranca’ ka bara’ ka temor ta’ bisa
mengo bungana atena lalake’ se atabu’ raja rowa.
Pamesemma ce’ seddha’na epandeng. Ekarassa
manes ta’ kalaban egulai.
Sakone’ gigina te-ngapote
etangale dhari bukka’na bibirra. Atena akenca’ neng dhalem dhadhana. Kalambi
mera satengnga notobi dhadhana. Dhuwa’ kancengnga edina
abukka’, kar-bekkaran sajalan kalaban serrona angen se ngeba
pello.
”Ba’na ja’
nyeksa sengko’. Kakan badhana se badha neng pamakanan
jareya. Ja’ ngantos dhulangan dhari sengko’. Are menggu lagguna ba’na paggun
epabali ka reng bine’ se aberri’ ka sengko’.”
Samenggu
sabelluna nyambelli
Are sateya pasar paggun ramme,
pastena bannya’ oreng se lar-bilir melle kabutowanna dibi’. Salaenna
bisa keya melleyagi kabutowanna
oreng se matoro’ barang. Bulan Molot
ta’ kera seppe dhari oreng se entar ka pasar.
Kabutowanna atamba bannya’
katembang are laenna. Se paleng bannya’ ekabutowagi ta’ kera lopot dhari buwa.
Daddi bisa ekoca’agi sabulan benteng pasar bakal ekadibi’i reng
ajuwal wa’-buwa’an.
Bulan noro’ gumbira nyakse’e kabadha’an
reng-oreng se padha bunga. Lebur manyettong kabunga’an se badha neng atena
bang-sebangnga oreng. Ta’ gun se badha neng pasar. Reng-oreng
se badha neng bengkona padha ngabunga’agi keya.
Samacemma buwa se edhasarragi
neng lencak ban neng lan-jalanna pasar ella
padha daddi sakse kalaban badhana bulan Molot
reya. Lalake’ se abadan jidhut jareya maddek neng
penggir los se mangadhep dhuwa’ barung. Ta’
kantha ngedhebbi oreng se sak-masek e adha’ ban
budhina reng lake’ se atabu’ raja jareya ce’ sodegga manjeng sambi asandhakep.
Buru sateya lalake’ se atabu’
jidhut jareya arassa ta’ aokep malolo neng bengkona.
Se biyasana re-saarena abarengnge embi’ kebas se eberri’i reng bine’ neng
pasar e dhinna’ keya tello bulan sabbanna.
Sabban are lalake’ jidhut jareya lakona gun coma ker-mekker kalaban
kabadha’anna se ta’ ekangarte juntronganna. ”Babine’!
Babine’! Reng
bine’ rowa, apa maksodda saongguna?”
”Apa se
bakal sengko’ totorragi dha’ reng bine’ arowa bila sakala
dhateng ban pas apapasan mowa bareng sengko’ e dhinna’ sateya. Sengko’ arassa
are Ahad laen katembang dhubellas Ahad sabelluna. Maskeya e lowar panasan
kabbi, tape pangrasana ate jembar parana. Sambi nyakse’e reng-oreng
se asalekmak nengteng sapalastik
wa’-buwa’an.”
Saabidda manjeng neng los pamaso’an
ka dhalem pasar, lalake’ jidhut rowa
nengkong teppa’ neng kennengngan se manjeng
gella’. Matana epanabang reng-oreng se lebat,
nyelle’ babine’ gan settong. Lalake’ se atabu’ raja jareya enga’ baktona
eberri’i embi’.
Teppa’
pokol bajaranna’ reng bine’ aberri’ embi’. Dhalem atena, moga-moga sateya
sengko’ bisa atemmo. Tang pekker ma’ lodhang kalaban kabadha’an reya. Acora’ ta’ pate sanggup pole ngowan
kebas se ta’ mangeddha tedhung bila tengnga malem.
Menta togui bai neng
kandhang. Bila ngowan menta dulang. Kasta tadha’ padha bila enga’ bakto narema
tampar se laju napa’ ka
pergemma tanang. Sakeng bisa mabali bakto se la tapongkor yaktena ta’ etarema.
Samalem
sabelluna nyambelli
Reng lake’ atabu’ jidhut dhateng
ka sengko’ teppa’na lampu listrik mate. E
amper lowar gun etera’e calopagan dhari mennya’
eggas. Damar se ekagabay dhari butolla nom-enoman, abarna mera ate towa.
Esombuwi kalaban kapas se epentel, ale’-pale’ ecabbur ka
dhalem butol, nyedding kalaban mennya’
eggas gella’.
Bungka raja se badha neng adha’na
roma sajan daddi moket celleng calemodan. Manyettong kalaban ondhem se ngombar
ce’ kandella notobi bulan ban bintang-bintang.
Angen dhateng nyalembu on-laonan. Apoy se nongko’ neng calopagan dep-keddebban.
Adan nyaot dhari attassa langgar. Bakto esa’ ella
napa’. Lalake’ atabu’ raja jareya amo’-kemo’
noro’e oreng se adan.
”Sengko’
ta’ tao ja’ epabaramma’a embi’ rowa.” Sambi ngangka’ gellas biddang se atotop,
reng lake’ neng adha’na sengko’ se dhiyem.
Gellassa eserrop. Ngenom gan sakone’.
”Bariya
bai. Mon oca’na sengko’ lebbi bagus pabali bai ka se aberri’ embi’ jareya ka ba’na. Otaba belli bai, onjang
tatangga se badha. Sapa tao ba’na ta’ kapekkeran pole.”
”Mon gun
se nyambelliya iya bai. Tape sengko’ reya gi’ ta’ atemmo
moso babine’ se ella aberri’ embi’. Pangarep, sengko’ terro taowa maksodda.
Ejuwal otaba esambelliya gampang.
Keng mon ella olle saroju’na oreng rowa.”
Settong lala’ ceccer dhari are se
tedhung. Nyalembu neng kello’na sombuna damar
calopagan. Bu-nambu. Sakejja’ elang, sakejja’ dhateng. Essena gellas pote se
badha neng adha’na etangale sa’arra
malolo.
Sowarana
jangkrek santa’ maranyeng sakale. Lampu eddhup temmo
odhi’ sakaleyan. Acora’ ta’ kalaban eparenta. Lalake’
atabu’ jidhut jareya nyerrop damar calopaggan, sakaleyan. Mate. (*)
Songennep,
2016
*)Guru e SMAN 1
Bluto tor SDK Sang Timur Sumenep. Ajar sareng ca-kanca LKSB
PANGESTOH Net_Think Community Sumenep.
Carpan eattas epetthek dhari Jawa Pos Radar Madura (JJPRM) eccaban Ahad, 20 Maret 2016
Tidak ada komentar:
Posting Komentar