CARPAN MUDHAR
CH*
RE-SAARE aba’na amendha
ajam. Odhi’
kar-karkar cocco’. Lake-bine kodu
abanteng tolang kaangguy
nyambung odhi’. Bengkona
ko’-rongko’. Bengko sangkolan dhari
reng seppo dhuwa’na. Bengko bangsal kona. Bengko se ta’ ekeng-pangkeng. Naleka maso’ gun
badha lencak ban lamari nonggal.
Ana’na dhuwa’an. Se
sareyang babine’ kellas lema’ SD anyama
Ennur. Se nomer
dhuwa’ lalake
omor tello taon satengnga anyama Sale. Ana’na
se dhuwa’an ceng-kencengnga ajajan. Tadha’
pae’na kakanan. Se lake’ jang sara’an pole. Ta’ gun dujan
jajan, tape dujan melle en-maenan.
Supeya
ban Druksin gun alako ngala’ derrep beddhugan otaba areyan. Kadhang, Druksin
noro’ majang ka tengnga tase’. Mon teppa’ bannya’
juko’, e bakto pettengngan, bisa
bai ollena pesse lebbi bannya’ dhari
ollena ngala’ derrep. Tape e bakto tera’an, kadhang, alonca’ coma. Apa pole bakto angen barat. Sajan
ta’ bangal se kalowara majang.
”La ngenjam pole, Le’.”
”Ya, ta’
poko’, Ka’. Jaba moko’e gallu, buru olle
ngenjam pole,” Supeya ajerna’agi ka se lake’.
”Mon
moko’e barampa?”
”Iya bannya’,
Ka’, dhapa’ mon pa’ ratosan.
Jareya bai gi’ ta’ majar dhindha. Mon ban dhindhana bisa lema ratos saekettan.”
”Mon
ngenjam ka sempennan kamrat laen, baramma?”
”Tao
ya, Ka’!”
Aba’na
ta’ tao baramma carana nyare leggerran enjaman pesse. Bannya’ karja. Reng
katello dhalem sabulan e kampongnga. Lalabadan ka
reng mate gi’ ta’ entar. Ka reng se gi’ buru
arembi’ gi’ ta’ atatili’.
Ollena
alako se sabban are ta’ nyokope ekabalanja. Apa pole
bannya’ tengka. Tong-settongnga jalan Supeya kodu ngenjam pessena sempennan e
kampongnga. Se maste, mon la nyamana sempennan neng e kamrat, sapa’a bai se
ngenjam kodu abudhu’i sapolo persen.
Ompama ngenjam Rp 100.000, pesse kalowar Rp 90.000. Bajaran ececel sapolo kale gan Rp 10.000 sabban
minggu. Ban pole
mon mingguwanna ta’
bisa nyettor, edhindha sakeyan persen dhari
settoran mingguwan.
Nyatana
kabbi masarakat aromasa eperres. Tape baramma’a
pole, perressan se erassa’agi aba’na ban
reng-oreng se ngenjam pesse ollena kapotosan angguta
kamrat se noro’ sempennan. Bannya’ keya angguta kompolan se ngenjam pesse sempennan. Tadha’ peleyan, sapa’a bai se ngenjam padha.
Padha abudhu’i
sapolo persen. Padha nyecel ban minggu.
Padha edhindha ompama nongga’.
Bukka’an
otaba du’uman sempennan biyasana ra’-para’ tellasan. Otamana tellasan Rama
otaba Idul Fitri. Daddi, satengnga bulan abellunna
powasa’an, reng-oreng se ngenjam la kodu
mapoko’ cecelanna.
Mon
pas badha se ta’ poko’, kodu asadhiya
ekala’ barangnga. Badha TV, ekala’ TV-na. Badha kasor,
iya kasor. Mon tadha’ essena roma se ekenning kala’, bisa
bai gentengnga romana se epatoron. Ekala’ ban pangurussa
kamrat bagiyan sempennan.
Dhapa’
ka bakto se etantowagi, paggun ta’ bisa moko’e otang-otangnga. Bannya’na korang
lebbi Rp 6,5 juta. Rp 4 juta ka
kamrat se ekatowae Suwamar. Rp 2,5 juta ka
kamrat se ekatowae Rikwan.
”Le’,
Peya, engko’ pessena sempennan ta’ akompol. Pesse Rp 15 juta,
areya’ gun badha Rp 7 jutaan. Lebbi
saparo badha e lowar. Mara ba’na ja’ matodhus
engko’ ka angguta. Mayu pabarenteng se
lake’ soro nyare,” Suwamar nagi settoran ka Supeya.
”Engko’
ma’ap, Ka’, banne engko’ reya
matodhusa ba’na.
Engko’ ban Pa’na Ennur la padha usaha
nyare enjaman epanyerra ka ba’na. Lampana
para’ powasa’an, oreng padha
buto pesse, Ka’. Ca’na engko’, Ka’, apa’a bai
eenjama gallu. Tape tadha’ reng aberri’ enjaman. Ngenjama sape,
orengnga se andhi’ kapotongan. La burung bariya.
Ngenjama emmas otaba BPKB padha tadha’
reng aberri’. Engko’ paggun usaha, Ka’.”
”Ba’na
se lake’ dha’ emma, ma’ tadha’
ngalemba’? Kabala ya ka se lake’, engko’ dha’
enna’!”
”Adha’,
Ka’, noro’ majang. Pola
olle sakabalanja’an. Ngenjama ka jaraganna sampan, orengnga gi’ buru melle
messin.”
”Rosak
apa messinna?”
”Enja’
ta’ rosak. Arowa se kaelangan messin tompa’anna Pa’na Ennur.”
”O,
iya engko’ ngedhing. Se badha
ngeco’ rowa?”
”Iya,
Ka’.”
”La
dina engko’ moleya. La kabala ka se lake’, engko’ ja’ patodhus
ka angguta!”
Suwamar
mole. Supeya paggun ju’-toju’ melget e babatorra. Cethakka ekarassa berra’.
Anyaba, dhadhana
aromasa seksek. Matana anang-konang. Meddem sakejja’. Dhari elongnga
nyergu’ angen epakellet, ban eonju’agi sakaleyan. Sakone’ berra’na cethak
arassa dhammang. Seksekka dhadha
semmo lorga. Aba’na duli jaga, nerrossagiya
sa’-sassa’an neng e somor.
Sadhapa’na
ka somor, Supeya nemba aeng gabay adurmas
guy-angguy se mare esabun. Monyena tangkereyan se abit ta’ eminnya’i kala ka
sowarana Suwamar se gun ekoca’agi laonan. Kopengnga ngapeyeng. Sowarana
tangkereyan se ranyeng aoba ka sowarana Suwamar.
”Ja’ matodhus engko’ ka angguta.”
Sajan santa’ tanangnga se ngalap aeng. Sajan
santa’ keya sowarana Suwamar e kopengnga.
Mare sa-sassa, Supeya
asapowan ban kes-marengkes e romana. Sale,
ana’ lake’na gella’ epalagguwi noro’ majadhi’na amaen ban sapopona. Ennur,
ana’ bine’na se kellas lema’ SD dhateng. Dhateng
sambi nanges ginggingan. Etanya’agi
ma’ nanges, ta’
ajawab. Tape sajan daddi se nanges.
Supeya
la ngarte. Paleng atokar ban kancana. Dhari
ettassa, Ennur makalowar dalubang hasella ujiyan.
Olle saratos tape la eret-carret. Dalubangnga
kecco, lottho’, ban leccek.
Ana’na
se nanges seggumen erekkep. Eseyom
eromrom. Epatoju’ ka reba’anna. Eapol ana’na. Banne sakaleyan dhu
kale. La li-baliyan ana’na mole nanges dhari
sakola’an.
Mon
ujiyanna teppa’ kabbi, olle saratos, ban ca-kancana ekoca’ ollena neppa.
Dalubangnga pas emet-romet, egulur ka tana daga lottho’. Ennur
pajat moret se paleng penter e kellassa. Tape mon
Ennur olle 90 ka attas
ban kancana ekoca’ ollena roce, ollena neppa.
Settong
bakto, Supeya entar ka guruna,
abala otaba atanya sabab pan-barampan are Ennur
ta’ endha’ asakola. Mon tedhung
ekaja’-ngaja’. Tako’ se kalowara roma. Tako’ se
tatemmowa ca-kanca kellassa. Lakona akeddhem.
Guru
kellassa ban kapala sakolana
ajerna’agi ja’ mon Ennur lakar mengka, penter, ban
ka pangajaran lekkas nangkep. Bida ban
na’-kana’ laen. Ennur buru endha’ pole
asakola saellana guru ban sabagiyan ca-kancana entar amaen ka bengkona ban
ngajak asakola pole.
***
Dhapa’ ka powasa’an, Supeya
paggun ta’ kellar majar. Angguta kompolan ban
masarakat molae ramme. Ramme se arasan reng-oreng se ta’ kellar nyerra otang ka
sempennan. Banne gun Supeya settong. Sabagiyan se ta’ nemmo epamajara molae
abalasatan. Buru
otaba nyengga dhari kampongnga kalaban alasan nyare
lako.
Nyatana,
todhus ban tako’. Sabab,
mon eken-reken, ta’ maso akkal mangkat alako e bakto ra’-para’
tellas. Keng la dhari posangnga. Badha
se mangkat ka Jakarta. Badha ka Kalimantan.
Badha pole se mangkat ka Malaysia.
Druksin,
lakena Supeya, se taon-taon sabellunna ta’ tobang
atarawi ban adarus e masjid, taon sateya lat-collat. Abannya’an ta’ atarawina.
Darusan la ta’ ekedhing sakale sowarana. Baktona ka masjid
tadha’ eguna’agi nyare leggerran enjaman
pesse otaba barang se bisa ejuwal otaba epagadhi
guna nyerrae otang ka kompolan.
”Mon
pon ta’ nemmo pole dika, Cong,
enjam sape settong e kandhang. Pon juwal ka dagang! Tape, neko
badha tapena,” Mostar
se acaca ta’ epaterros. Sangaja manceng ngartena Druksin. Roko’ se mare egulung
duli etoppeng pas ekello’e.
”Enggi, Ba’. Kaula nogga ka maksodda sampeyan.
Neka dhaggi’ kaula ngokor lajjan, kan?” Druksin
ngoca’ ngarte, tape atanya sabab aba’na ngarep ngenjam
biyasa, ta’ kalaban ngokor lajjan.
”Mon
pon ngarte ma’ gi’ atanya dika? E bila se
ejuwala, pon giba dagangnga!” roko’na esergu’ pole epakellet. Pepena daga kelpong.
Okossa asale’bungan. Ta’ tao bako badalla dhimma,
bauna kerreng ban apek. ”Tore ka kandhang, Ba’, kaula
terro onenga ka sapena.”
”Ba,
maddha. Bula gi’ ngala’a senter gallu.”
Druksin
napa’ ka adha’ ka
kandhang. Sape laju gabal agaluddhak. Druksin nyorot pan-barampan dindak. ”Asowara,
Sin, ma’ la-ngalae
ka maleng dika. Nyemma’e sape pas ta’
asowara,” Mostar aorak dhari taneyanna sambi dhing-ngendhing
la neggu’ senter. ”Ko! Ko! Ko!”
Ngedhing
sowarana Mostar, sape se gabal neng-enneng dhakkala. ”Dika
ngenjam se temoran. Lajjanna gi’ eobuwa ban bula. Pola sataon satengnga aggi’
olle antes,” oca’na Mostar sambi nyenter ka sapena.
”Enggi,
se ka’emma’a saos pon, Ba’.”
Saellana
nenggu sapena, Druksin amet mole. Bakto la cokop malem. Bulan tera’ tar-kataran. Bintang tep-ngarettep agenna’e endhana
langnge’. Badha
bintang karteka, bintang ngay-songayan,
bintang nanggala, bintang pe’-kope’an,
ban bintang-bintang se laen. Sabakto-bakto ondhem
pote ngalange tera’na bulan gaggar ka bumi. Ebbun toron mabacca apa’a bai se
badha e lowarra ata’.
Supeya e
bengkona gun ali’-bali’ gubang ta’ nyeddha tedhung.
La tengnga malem se lake’ gi’ ta’ dhateng.
Pekkeranna man-dha’emman. Enga’ keya ka oca’na Suwamar e
bakto nanagi sabellunna powasa’an. Paggun paddhang
neng e kopengnga.
Mon
Rikwan laen pole. Oca’na gun nyoro usaha’agi. Tape
se bine’ se ce’ sarana. E tase’ e tamennanna bulung daddi satase’. E pasar
daddi sapasar. E kamrat pangajiyan bariya keya. Badha
e dhimma’a bai binena Rikwan katon ta’
genna’ mon ta’ arasan Supeya.
Settong
oca’na binena Rikwan se cekka’ e atena Supeya, ”Senga
mon ta’ kellar majar nyambi kanthong ka tatangga, aburumaen!”
”Le’,
Peya!” Druksin ngolok sambi nokthok labang.
”Iya,
Ka’,” labang ebukka’ dhari dhalem.
Druksin maso’ nyaba’ songko’ ban macangke’ kalambina ka pako e bara’na labang.
Ana’na se dhuwa’an la padha
tedhung.
”Aengnga
gi’ ta’ etolong?”
”Enja’,
Ka’. Arowa’ paggun badha e andha eteng.”
”Pelka’
engko’, Le’.”
Supeya
duli ngala’ aeng se eebbunnagi ebaddhai cantheng. Druksin lakar la biyasa ngenoman
aeng se epaebbun. Sala settongnga cara naleka aba’na terro aeng cellep e bakto
malem sabab ta’ andhi’ kulkas. Cellep onggu rassana ka
gerrungan. ”Baramma, Ka’? Hasel?”
Oreng kadhuwa padha
toju’ e lencak perreng e nga’-tengnga’anna taneyan.
”Engko’
dhari Ba’ Mostar.”
”Adhu,
Ka’, dhapa’ ka pocak temor? Ta’ manglo sampe’
malem.”
”Ta’
tao, noro’agi tengka’na soko. Ma’ temmo enga’ ka Ba’ Mostar.”
”Oba’
Mostar bine’ tao ja’ ba’na dha’ essa’?”
”Iya,
tao.”
”Olle
enjaman?”
Druksin
ajerna’agi ollena parembagan kalaban oreng sogi se badha
e kampong laen. Gi’ bau bala majadhi’
kalaban Supeya. ”Mon ngokor lajjan baramma, Ka’?”
”Sape
jareya sapasang. Settong ejuwal, ompama
paju Rp 6 juta. Rp 6 juta jareya
se eenjam engko’. Lajjanna kan eobu ban Ba’ Mostar. Gu’-laggu’ mon engko’ andhi’
rajekke epamajara, majar saargana sape se eobu Ba’
Mostar. Ompama Rp 8 juta, iya Rp 8 juta. Ompama paju sapolo, iya majar sapolo.
Daddi sajan abit se kellara majar, sajan alorju’ lajjan se eokor. Sajan bannya’
otang se kodu eserrae,” Druksin majarna’
maksod dhari enjaman sape ngokor lajjan.
”O… enga’
jareya ya, Ka’? Iya atamba terros
otangnga. Mon reng sogi ya, Ka’, dunnyana alarja’ dibi’.”
Bakto
ajalan ta’ ekarassa. Dhari masjid ban langgar la padha
ajaga’an saor. Supeya jaga, maso’ ka dhalem
romana se maranta’a saor gabay lakena ban ana’na se wa’-towa’an. Pan-barampan
kale pette’an kompor eggassa ollena bantowan dhari
pamarenta buru odhi’. Supeya nganga’ kowa juko’ cakalan ollena se lake’. ”Giba
ka lowar, Le’, engko’
gi’ ka somora.”
”Iya
la, areya’ juko’na gi’ eanga’.”
Ta’ abit
saapa tangkereyan e somor ngacereng. Monyena tangkereyan se ranyeng maenga’
Supeya ka oca’na Suwamar. Padha ban e bakto
aba’na nyassa samolena Suwamar nanagi. Monyena tangkereyan se ngacereng abit
ta’ eminnya’i, ekopengnga Supeya aoba sowara, ”Ja’
matodhus engko’ ka angguta
kompolan.”
Supeya
agella’ kadibi’, ”Hihihi, manossa loco ta’ kalaban alawa’. Se
locowan pole nyoro oreng nyambi kanthong,
aburumaen. Hihihihihi...”
Kowa se
eanga’ ngalkal, ngelpak ngalapak. Kompor epacetthat. Mate.
Matena kompor ta’ mamate pekkerra Supeya. Pekkerra Supeya atamba ngalkal,
ngelpak ngalebbi’i kowa e attas kompor. Ngalkalla pekkerra Supeya kalowar ka
colo’na aropa gella’. Agella’ kak-ngakak.
”Hahahahaha,
se paleng loco ngokor lajjan. Hihihihihihi... tape ecapo’ ngokor lajjan tompes.
Badhana tang-otang lonas, bennas. Odhi’na
reng sogi nompo’ emmas. Odhi’na
reng mesken noro’ bennas.” (*)
Laher e Sumenep, 29 November 1980. Guru e Ma’had
Al Ittihad Al Islami (MII) Camplong, Sampang.
Epetthek dhari: Otang Ngokor Lajjan
Tidak ada komentar:
Posting Komentar