CARPAN HASMIDI
ENJA’ dhari
dhimma dungngeng reya bakal emolae.
Oreng odhi’ se
laen tantona ta’ padha ban se ejalane sengko’ sateya. Lake
mate. Lako ta’ andhi’. Ana’ se daddi
tanggunganna aba’ tatello’. Pojur se wa’-towa’an ella abine ban bisa nyare
lako. Bisa makane ana’ ban binena dibi’.
Dineng sengko’ neng dhinna’ reya
ta’ andhi’ pangoreban se teppa’. Serrena aba’ gaggar
dhari kabadha’an senneng, bakto sabelluna ta’ kakorangan pan-apan. Aba’ arassa sossa ta’ kabarran. Maskeya
andhi’ saba sanya’-bannya’na, ta’ bisa alako
dibi’ parcoma keya.
Maderrebba
oreng ta’ andhi’ pesse se epamajara lalakona. Ta’ elakone, tatamennan se etabur neng
attassa ta’ kera odhi’. Maskeya bisa odhi’ ejap ta’ kera mergi’ kalaban
samporna.
Tong-settongnga jalan, tadha’
laen, iya areya gun coma bisa epagadhi. Areya
sateya se bisa sengko’ lakone. Tape enja’ ta’
kakabbi sabadhana saba dadinanna oreng towa
lake’ ban ba-gibana tang lake’.
Aba’ edina oreng towa lake’
bellung taon saabidda. Lema taon saterrossa, lake se nyosol. Embu’ ban na’-ana’
se tatello’ samarena laju daddi tanggunganna sengko’.
Banne coma sossa. Odhi’
dhalem kabadha’an enga’ reya acora’ nyosola keya. Apolongnga
moso eppa’ ban lake. Tape, bila
eli’-bali’ sambi tang-gentangan neng kasor, metong
osok neng kamar egellu’ Watir ban Sulis acora’ neser ban ta’ tega adina se
kadhuwa. Mon gun epasra’agina
ka embu’ aba’ apangrasa dusa.
Tang embu’ reya lakona gun atogu
cobik, gaddhang, ban kalasa neng pasar. Ren-arena se ekagabay nongngo’ tomang
ngala’ dhari ollena embu’. Asella bisa
ebitong ta’ osa ngangguy kalkulator. Cokop
ngangguy garigi’ se badha neng tanang dhuwa’na se ella padha kero’.
Tor kadhang
dhari ollena ajuwal nyeyor karena dhari saba se gi’ ta’
epagadhi ka oreng epaddi panyambungnga odhi’ re-saarena. Dhari sarenjing se ekaolle sengko’ laggi’ kodu
aberri’ ka Mahdi, oreng se nae’ ngala’agi nyeor.
Jareya aropa’agi
opa dhari pellona ban ne’-sakone’ kole’ lowarra se ceccer neng bungkana nyeyor.
Ta’ andhi’ apa pole se bisa ekalamban
kaangguy nambai opana jareya. Cokop tello’ nyeyor
genna’ kalaban talanggaranna.
Mahdi kadhang menta pappa moso
janor otaba kalarena kaangguy egiba mole. Aba’ se gun daddina ro-nyoro bisana
gun aonggu’ nyanggubi pamentana. Yaktena sengko’ keya se bakal gampang
mon bisa magampang oreng. Sengko’ mon bisa nolong oreng, oreng paste bisa
nolong sengko’ keya.
Tor kadhang mo’dul
keya dhalem pekkeran kaangguy nyare lako ka Malaysia otabana ka Arab Saudi
noro’e ga-tatangga se ella bannya’ ollena se alako. Neng
Arab ta’ gun coma alako malolo. Bisa umro otabana
bisa alako ajji. Tape
embu’ ba’ bisa’a arabat na’-kana’ se dhadhuwa’ reya?
Watir kana’ kene’ se gi’ ta’ tao
pan-apan. Samarena pamatena eppa’na
laju daddi na’-kana’ se manja. Ca’na
oreng, pajet mon ana’ jatem lakar asanta’an
manjana. Cengkal paggun iya. Nyamana bai
na’-kana’.
Aba’ tor kadhang arassa talka
bila Watir mamenta se ta’ bisa etakkane mon sengko’. ”Melleyagi,
ana’ jatem, ame’ nolae,” sabagiyan oreng se ta’ arassae kabadha’an
enga’ se ekarassa sengko’ bisa apolang ban acaca ngala’ samettona bibirra.
Tape sengko’ ta’ andhi’ kobasa
kaangguy ne-bane pangarabba Watir. Sakeng Watir ta’
careme enga’ Sulis. Bisa ebalai.
Aba’
tantona daddi oreng towa se jembar ban bunga andhi’ ana’ padha toro’ oca’
kakabbi. Sengko’ perna keya nalekteggi kabadha’an na’-kana’ jatem se badha neng
eseddi’na roma. Acora’ padha. Cengkal. Nyeksa. Manja. Kodu
etorot ka karabba.
Sulis pendha atoro’ oca’. Ebalai
bisa aonggu’ ban ta’ mamanja enga’ ale’na.
Osom imtihanan sakejja’agi’. Biyasana
mon gi’ badhana tang lake, sakabbiyanna ana’na emelleyagi kalambi
bang-sebang. Tape sateya, sengko’ ta’ bisa nyalene tong-settongnga
kalaban kalambi anyar.
Roma se ekennengnge
sengko’ reya lakar teppa’ ka rammena sakola’an. Bisa epekker, dhimma badha
settong kampong sakola’anna sampe’ tello’an. Kajabana neng
kampongnga sengko’. Bila
imtihanan settongnga mare, gi’
ngalle ka imtihanan sakola’an settonganna. Bareya
sabban taonna.
Jareya ella
bisa ekoca’agi wajib nyombang ka
sakabbiyanna sakola’an se badha. Laen pole bila gi’ eonjang neng kampong laen. Otabana
badha kampong laen se badha sakola’anna keya mabadha imtihanan se saropa se ta’
bisa ngaleng, koduna nyombang.
Ompamana gan sagantangan, gan
tello’ sakola’an bai ella tello gantang. Mon se laen mabadha keya neng bulan se padha
saongguna ta’ bisa gun coma epekker. Kodu ban wajib moter otek kaangguy nyare
se bisa’a ngeppe’ ettas akantha oreng laenna.
Aba’ banne ta’ daddi se ta’
entara. Sakeng aba’ aromasa ta’ kowat bila
ngaedhing tang nyama ebut-sebbut. ”Apa
ja’ sengko’ ta’ nangale, Mar,” ca’na settonganna.
Baramma keya ca’na
selaen? Bisa-bisa, ”Iya,
padha, sengko’ ta’ nangale kalemba’na. Biyasana,
Mar areya...areya...areya...” ban salenna se bisa ekoca’agi mon ella temmo
apol-kompol.
Se apasa’a
kare metong are. Oreng se badha paste ella padha maranta sabaragat
cem-macemma bahan se bakal eangguy ka-buka. Tantona keya ella badha se maranta kaen
lakaran se bakal esekot eangguya bila are
tellasan.
Paste badha keya se melle jat
ella daddina. Sakeng aba’, apa se bisa eparanta dhalem
ngadhabbi pasa’an reya? Ta’ osa
alengka ka tellasan, sabban arena kaangguy bukana bai aba’ ella gimeng. ”Mara
ollena ajai’ jareya kagabay ajanga buka.”
”Ta’ reng mon badha se majar, Bu’.
Sabannya’na oreng se ajai’ gi’ aotang. Paleng bannya’ se entar ajai’ ka dhinna’
na’-kana’ se mondhuk neng dalem lao’. Sengko’
ta’ daddi se ngala’a pessena
na’-kana’ pondhuk.”
Se daddi
pekkeranna sengko’ sateya, baramma se kadhuwa jareya bila napa’ ka
are tellasan se andhi’a salenan. Imtihanan
se gi’ buru bai kadhuwana paggun ngangguy kalambi se seggut eangguy.
Sengko’ neser bila napa’ ka
tellasan se bakal dhateng kadhuwana paggun ta’ asalenan. Yaktena paggun ekadhi’-andhi’ mon Watir. ”Pa’na
Hasan kamalengan”. (*)
*)Alumni Pondhuk Al-Ishlah ban STKIP PGRI Sumenep. Ngajar e SMAN 1 Bluto ban SDK Sumenep.
Epetthek dhari: Kalambi Tellasan
Tidak ada komentar:
Posting Komentar