Kottha Bacca
kotthana bacca
kottha kene’ cope’ messom jalan lorongnga
sompek sowap panas angenna
najjan tadha’ pabrik
badha gun coma tahu tempe
desember tapongkor kotthana dehidrasi
inpus naccek e man-dhimman
kotthana bacca
mabacca kaos soko saragam sakola’an
abegga genteng kennengan ibada
parnata sosial nyellem amperra
salebbar dhalemma bacca keya
maempon aorta
bibirra biru
tanges ngejjel celeppa ta’ majaga tedhungnga
buta mata nyompet atena
asatta aeng ta’ maasat pangaterrona
saare makerreng peyatanna
badha se lako mabacca kanthongnga
Dhakka
bannya’ abi’na sakone’ lako
bajeng arajek ngala’ tabunna
bubur ecacca kasella kendhuy
mon asadaka kakanan baruy
cabbi jamona ecampor manggar
bakto gi’ kana’ jau ka langgar
esambat nase’ ta’ kaangguy maperna tabu’ se
mosse’
nyamana juko’ ta’ ejujju’ patako’
oreng dhakka
mate daraka
Baburugan
cong, bing!
pangeranna Allah se Maha Kobasa
nabina Muhammad panodan ummat
ketabba Alqur’an pamerte tengka
ajalan soga’ dhalem lampanna
bida areya lakar biyasa, ta’ osa patajem neng e
konco’na
mon badha kalero otaba sala
ta’ olle nyangka megga’ ban amosowe
cong, bing!
daddiya baringen korong
rampa’
anaonge magarsare
*)Lahe e Sumenep, 29 November 1980. Guru e SMP Al Ittihad Camplong, Sampang.
Sanja’ e attas epetthek dhari Jawa Pos Radar Madura (JPRM)
eccaban Ahad, 1 Mei 2016
Tidak ada komentar:
Posting Komentar