ROMANA Jufri
se asalla seppe, sateya la padha ramme. Bannya’
oreng se ka bara’ ka temor, ta’ lake’ ta’ bine’ la
padha emo’ kalaban kalakowanna. Molae
ngeba jajan, makalowar nase’ ban juko’na, ngatore
tamoy, tor laen-laenna. Rassana tadha’ se
neng-ennengnga. Sabab, bakto
gapaneka nyatana badha acara se talebat raja. Acara kabinan antarana Arman ban Surti.
Bakto pokol ballu’
kalowargana Jufri bakal
entara alamar dha’ romana Surti. Sakabbinna pakakas se bakal
egiba’a ampon eparanta. Lencak,
lamari, korse, anten parabola ban
tivina ta’ katinggalan
se egiba’a. Jufri abasanna ta’ nyaman neng-enneng.
Ngator bala tatangga kaangguy
bisa tartib egiba’a dha’ ka calon
mantona. Tape karepotan tor kasennengngan
bakto acara kabinan nyatana ta’ bisa
erassa’agi sareng binena Jufri, Masriyah.
Mowana sarat
ta’ nyonar. Nandha’agi
aba’na andhi’
masala se langkong raja.
Maskena tamaso’ ana’na dibi’
se bakal aparlowa, tape teptep ta’
bisa notope dha’ ka masalana. Kadhang,
dharina ta’
kabuwa’ nanggung
masalana, Masriyah temmo maelang. Ondhur
dhari pangabasanna oreng bannya’. Bakto
ta’ abit, Masriyah
dhateng dhalem kabadha’an
ropa se badha karena gilina aeng mata. Sonarra
tagerus bi’ masalana se langkong
raja.
Pamanna se anyama Dharmo ropana ngarte dha’ ka masala se ealame Masriyah
sareng kalowargana. Jellas dhu taon bakto se tapongkor
Masriyah langkong daddi oreng se ce’ sogina. Sadaja kabutowan ban pangaterrona lekkas tekka. Sabab, artana se magampang kabutowanna.
Adagang bako kalaban Jufri ngaselagi
kaontongan se langkong raja. Andhi’ motor
ban salaenna ta’ tanggung-tanggung bannya’na. Ana’na, se coma
settong, Arman, seggut emanja bi’ oreng towana. Seggut agaul bi’ oreng meller, bu’-mabu’an,
amaen e tengnga lorong sampe’ aganggu dha’ kabadha’an
reng-oreng e tengnga lorong.
Se
talebat sara, Arman kadhang amaen babine’. Ate-gante sabban bulan. Kalakowan se elakone saterrossa
gapaneka pas aperreyan dha’ oreng towana. Kasogiyan
se badha gan
sakone’ terros elang. Kadhang otang se etanggung ka man-dhimman
kaangguy nyokope dha’
kabutowan ana’na tong-settongnga.
Sabban malem seggut alan-jalan
wa’-dhuwa’an
sampe’ tengnga malem. Bannya’ aganggu
dha’ paraban kaangguy eco-koco tor
neng-sennengngan se ta’
aberri’ manpa’at. Sabab, talebatta
jubet babatekka Arman dhalem
amaen babine’ se banne ha’na.
Reng-oreng
se nangale badha
se aromasa caremmet tor bajik. Saengga
masyarakat pas temmo aparanga kaangguy nangkep
Arman bila malem. Otamana bakto ngeba
babine’. Tako’na mon etorot aherra aperreyan ka
se lebbi raja’an.
Teppa’ malem minggu.
Ra-kera pokol dhubellas
malem. Arman gi’buru dhateng dhari taman bunga, Songenep,
abareng babine’ se anyama Surti. Bakto lebat e pakaranganna Rusdi se bannya’ kalaban bungkana
perreng, Arman temmo eaddhang. Epaksa
ambu ban eancam epateyana mon ta’ nekkane hajadda. Karana tako’
ngabas are’ se teggu’ oreng, Arman
neng-enneng ta’ bannya’ guli.
”Man, ba’na sateya
kodu nanggung kalakowanna se talabat
ce’ sarana”, oca’na oreng kalaban
mata abarna mera.
”Maksodda
apa reya? Sengko’
ta’ ngarte,” jawabba laon
sambi ngetter.
”Babine’ se ekeba jareya kodu kabin. Mon ba’na
pas ta’ endha’, dhaggi’ ba’na epateyana”,
cacana tenggi ban ta’ alos sakale.
”Tape
sengko’ ta’ ngalakone sala, ma’ pas taker ekabina?” Arman nyoba’ acangnga’ polana nganggep
aba’na ta’ sala.
”Kalakowanna jareya se talebat sala adaddiyagi
reng-oreng ta’ senneng polana badhana ba’na.”
”Enja’, sengko’
ta’ ngabina,” polana paggun mangkal, are’na oreng se
talebat tajem esandhingagi ka le’erra. Arman
rassana ta’ bisa alaban. Arman tapaksa nyanggubi
pangaterrona reng-oreng. Saenggana bisa mole, maske atena ta’
jembar.
Sadhapa’na ka romana, reng-oreng la padha acaca kalakowanna Arman
se ecapo’ tangkep. Oreng towana se ngedhing
ana’na ekacaca tatanggana ka bara’ ka temor, apangrasa tapengsor. Sabban are aba’na ta’
kalowaran kadiya agaul ban sakancana. Aba’na malo
talebat raja. Darajadda kalowargana daddi toron polana ekacaaca se ne-banne bi’
sakabbinna oreng.
Ta’ sampe’ sabulan, oreng
towana Surti
temmo dhateng dha’ romana Jufri sambi nyambi are’ ban sakancana. Jufri
se nangale takerjat
kadiya kaddhal labu. Mowana mera asaloy tako’ ban ngoso’ daddi
settong.
”Jufri, e dhimma ana’na ba’na sateya?” oca’na sambi rak-orakan.
”Badha apa reya, ma’
dhateng ka romana oreng ta’ tao ka atoran?” jawabba ta’
kala tenggi.
”Ana’na ba’na
se ta’ tao ka atoran.”
”Maksodda
apa? Ja’ kor acaca se ne-banne.”
”Ana’na sengko’, Surti, sateya temmo ngandhung
polana ana’na ba’na. Mon
sampe’ Arman ta’ tanggung jawab, sateya
keya epateyana,” oca’na sambi
neggu’ are’ epatenggi. Jufri ta’ bisa ajawab sabit-abitta.
”Badha apa
reya, ma’ pas agir-gigir ka tang lake?”
”Kedhingagi, ana’na sateya temmo mangandhung
tang ana’. Mon sampe’ ta’ atanggung jawab, ja’
arep Arman bakal odhi’ lanjang!” ngedhingagi
cacana, Masriyah robbu ka karamikka.
”Mas,” Jufri
acerreng.
”Sengko’
ta’ malanjanga parkara pole. Mon sampe’ ta’ etekkane
tang hajat, tao dibi’ dha’ramma
kadaddiyan se bakal
ekaolle kalowargana ba’na
dha’ budhi,” oca’na oreng towana Surti sambi materros
mole ta’ le-toleyan.
***
Jufri matekka onggu dha’ pangaterrona Sadik
kaangguy makabin ana’na. Tape, nalekana bakto
ngangko’a pakakas lamaran, Masriyah
ta’ war-kalowaran
dhari romana. Bala tatangga la
padha adhante’ kapotosan dhari Masriyah
se mangkata. Abit
edhante’ ta’ lem jellas-jellas
mowana Masriyah.
Ta’ eka-sangka nyatana temmo badha
oreng acerreng.
”Masriyah
agantong, Masriyah mate agantong…” reng-oreng padha tacengngnga’
ngedhingngagi
cacana. (*)
*)Ketowana PAC IPNU Lu’-Gulu’, Sumenep.
Carpan e attas epetthek dhari Jawa Pos Radar Madura (JPRM) eccaban Ahad, 1 Mei 2016
Carpan e attas epetthek dhari Jawa Pos Radar Madura (JPRM) eccaban Ahad, 1 Mei 2016
Tidak ada komentar:
Posting Komentar