Carpan Hasmidi
Saare
”DHAGGI’
bila epareksane sareng keyae, ja’ ngoca’ noro’ kawapatan. Koca’agi bai ja’ ella
ambu dhari kompolan se laju jareya. Neyadda pajet terro noro’a se anyar. Senga’,
te-ngate kalaban badha petenna dhari reng-oreng se lakar jat ta’ senneng
kalaban kabadha’anna Ke Seppo,” se katello jareya padha menjeng neng garasina
motor bikep celleng. Acora’ ta’ terro ekaedhinga oreng lowar. Gella’ sabelluna
abanta masala jareya se esongko’ pote le-toleyan.
”Sengko’ ngedhing keya badha seyaran
neng Dalem Baba.”
”Iya jareya. Sapa pole mon banne lakona
Man Halil. Oreng jareya pajat ta’ perna senneng dha’ reng Dalem Attas. Hosus
dha’ Ke Seppo.”
”Ba, mara se ngone’anna bato,” bantana
oreng lake’ dhateng dhari temor nyella dha’ ka galimpo’anna oreng se ka tello
jareya. Ta’ osa abanta pole Faizal malakowar motorra. Empa’ oreng nae’ ka embagga
motor celleng.
Are sajen ondhung ka bara’. Ngalle dhari
attassa cethak. Molae gella’ panassa ngello’ bun-embunan. Ngocor pello
ngalambak neng dhai ban pepe. Babine’ atempo mossa’e amper dhalem teppa’ neng
olo, penggir, ban onjurra Liyas. Sella’ ta’ nemmo we’-lowe’an kaangguy toju’
neng seddi’na mayyidda Liyas. Edhissa’ ella badha Suy se arang-berrang. Nanges
ta’ rida’ dha’ jasadda eppa’na, asandhakep aolo dhaja.
Samper abarna cokla’ towa abathek
kembang-kembang raja kene’ jareya egabay sapo’ ban notobi mowana. Kodhung pit-cupiddan
mera ekasaong neng cethagga. Robana pote cekka’, dhai ban pepena ella ta’
adhara pole.
”Keyae Faruk rabu,” na’-kana’ se
akalambi biru nyaladhar ka adha’na Ramli. Sambi manjeng ngantos keyae teppa’
neng adha’na. Sakabbiyanna oreng padha manjeng keya. Abaris dhuwa’. Badha se
neng dhi bara’ ban badha se neng dhi temor. Keyae Faruk lebat teppa’ neng tengnga’anna
oreng sambi asalaman, nyeyom astana.
Oreng sajan bannya se dhateng. Amper
sampe’ ta’ kabuwa’. Badha keya se toju’ neng lorong kong-nengkong, badha keya
se gun jeng-manjeng nyandhar ka tabon dhi temor.
”Ngereng manabi ampon seyap sadaja,”
Keyae Mudahra mareksane dha’ Ramli se molen gella’ gun jeng-manjeng neng
padduna amper. Sokona abangkang ta’ asandhal. Pola keng jat ta’ ngangguy apa
sakeng loppa ja’ eocol neng dhimma. Orengnga bai ta’ posang sakale. Neng
pekkeranna gun coma mekker dha’ se kapateyan.
Lo’-tello’
Ojan se sabeddhuk ninggallagi becca ta’
coma neng taneyan, tape neng terpal se ekagabay reng-tareng laggi’ manyapcap
aeng. Neng matana Suy ban taretana se laen padha becca keya. Sakejja’-sakejja’ agaremmeng
enga’ dha’ salerana eppa’na. Acora’ laggi’ ngombar gambarra mowana eppa’ neng
leng-cellengnganna matana saenggana matobbu jurbu aeng matana. Areya parjalanan
se dhi-budhina, atena sakabbiyanna oreng paggun enga’ ban pole bakal ta’ rida’
bila badha balana se mangkat.
”Eppa’na ja’ lako pekkeren, mayu’ sateya
ba’na ban tan-taretana se laen padha pabannya’ aparnyo’onan husussagi ka
eppa’na samoga eppa’na neng kobur salamet dhari seksa’anna banakeron. Mara
araop, ja’ neng dhalem kamar bai. Tamoyya ba’na bannya’ neng lowar. Mara
temmone,” sowarana dhammang kaedhinganna neng kopenga Suy. Ta’ abit cara apa
Suy jaga dhari tedhungnga terros mateppa’ sarongnga.
Tamoy bine’ adhatengngan dhari
man-dhimman. Ta’ coma dhari ga-tatangga se semma’, badha dhari Sendir, Kaleanget,
serta disa laenna. Banne sakeng kor entar bila badha reng kapateyan, tape
sakeng neng-ngenneng bala kalaban oreng se kapalangan, tamasok keya dhari ka
kaluwargana Suy. Se sajalur kalaban lakena padha entar keya alalabat.
Neng amper laen.
”Sapa se bakal epapaga dhaggi’ bila
atahlil?”
”Se jellas, Ke Seppo paggun osa papagan.
Sabbana sengko’ ngedhing dhabuna bila badha tatangga se tadha’ omor pakon papagan
ban bila napa’ lo’-tello’an ban to’-petto’an.”
”Kae dalem baba mon rabu keya baramma?”
”Dina paterros, kan se jellas gun coma
Ke Seppo se bakal epapagan.”
Malem nyalemba’ dhari temor, merana
edhina neng bara’. Sakejja’ daddi petteng neng attas. Bintang ban sowedanna
bulan ta’ bisa etangale mata. Dhari attas acora’ badha se gaggarra. Acora’
raja.
To’-petto’
Ta’ padha ban are biyasana, dhari gi’
tarhem reng bine’ se nginep ell apadha jaga kakabbi nyeyabbagi kaparlowan se
bakal eamba’agi dha’ tamoy se bakal dhateng. Maske gi’ ekataowen badha apa
enja’ oreng alalabat ban ajumla barampa oreng se dhatengnga, sakabbiyanna
epaseyap. Amper ban taneyan esapowen, lama’ teker eampar sanya’-bannya’na
kennengngan se bisa ekennengngen.
”Samoga’a ta’ ojan.”
”Iya. Olle padha samporna.”
Neng matana Suy ella ta’ etangale pole
rendheng se bacca. Gun coma bibirra seggut becca ngecap nyamana eppa’na. Biyasana
marena asambajang sobbu Suy ngajak lakena ban ana’na bine’na se laggi’ buru
aomor lema taon ngaji ka koburanna eppa’na. Ta’ coma sakaleyan ban arena,
biyasana ngaji dhukale. Bila mare sobbu ban samarena bajang asar bila tamoyya
ella mole. Tor kadhang, tamoy ta’ coma dhateng dhari laggu sampe’ compet are.
Malem kadhang badha keya abareng oreng se atahlil.
Lakar sesep kalaban parsangkana
reng-oreng. Are to’-petto’ bannya’ oreng se dhateng alalabat, nyambi ettas
ekeppe’, epasandhang, ban etengteng. Tatangga semma’ dhateng nolongen nyeyabbagi
sasoguwan se eatorragina.
Panas are ta’ pate nyengnga’ ka kole’. Ondhem
pote satengnga ngandhenge sonarra are. Samalem lakar badha ojan teppa’ neng
tengnga malem. Dhari pamatena Liyas sampe’ samalem ojan toron terros, ojanna
ta’ nanto toron baja apa. Baja laggu tor kadhang toron ojan, seyang ban malem
ta’ lopot dhari ojan raja ban kene’.
Malem tahlil dhi-budhina.
Oreng se dhateng kaangguy nyambunge
tahlilan bannya’ sampe’ mapossa’ lorong. Dhari lorong lao’ sampe’ ka teko’an ka
temor padha possa’ dhari oreng atahlil. Keyae Seppo mare epapak ban keyae-keyae
laenna.
”Pottrana Ke Seppo badha neng bilugan, e
dhi lao’na badha juga Ke Faruk sareng tarenan. Dineng neng adha’na barung
mantona Ke Seppo alonggu dhari gella’. Tore sampeyan bai se ngatorragi sopaja
malebbet ka dhalem akompol jugan sareng para keyae se laen.” Lalake’ se kobajar
jareya notorragi dha’ Ramli. (*)
Songennep,
2016
Epetthek dhari: Sanajjan Are Abarna Mera
Tidak ada komentar:
Posting Komentar