Nur Aisyah |
ARE la ondhung
ka bara’. Nandha’agi ja’ ta’ abit pole bakal compet. Padha ban sabellunna, are
compet sabban are. Mahmo ngajak bine, ana’, ban mantona entar ka teggal.
Tojjuwannya, kaangguy natta’ kaju.
”Lagguna
bisaos, Pa’. Samangken are ampon para compedda. Ta’ kera olle saponapa jugan
natta’,” ca’na Sum ka eppa’na bakto eajak.
”Lagguna ya
lagguna. Le-olle sakone’ balakka’ sateya,” saodda eppa’na sambi agangse birang.
Birang egursong ka sangra. Bila kessap, epasange aeng. Aeng se badha e polo’
kene’. Polo’ se ekabagay dhari tana.
”Mangkat la ka
adha’. Engko’ gi’ nyabbura berras,” embu’na Sum nyaot dhari dhalem dhapor.
Mahmo, Sum,
ban lakena mangkat ka teggal. Ajalan nojju ka temor lao’. Teggalla ta’ kose
jau. Tape ta’ semma’. Mon ngardhang ta’ ekaedhing. Eabas ta’ etangale keya. Kaalangan
ka ka’-bungka’an e teggalla oreng.
Ta’ abit pole,
embu’na Sum dhapa’ keya. Sabellunna mangkat, macco berras. Ngapoji apoy e
tomang dhalem dhaporra. Dhapor se ekagabay dhari bungkel ban tabing perreng.
Berras se etana’ banne ollena melle. Ollena se atane mosem nembara’.
Embu’na Sum
sangaja atana’ polana nase’na la tadha’. Ca’na, bila dhateng teggal ma’ nyaman
se ngakana. Ta’ gi’ repot tos-antosan pole. Ca’na, dhari teggal, mandhi, terros
abajang Mangrib, ban ker-dikkeran sampe’ manjing Isa’. Mare jareya, buru ngakan
areng-bareng e lencak bungkel dhalem dhaporra.
Mahmo, Sum,
ban lakena napa’ ka teggal. Se katello nyare kennengngan bang-sebang. ”Badha
ponapa ka’dhissa’ gi, e bara’ dhaja ma’ enger-enger?” Sum atanya saellana
natta’ olle tello renca’.
”Palengan
na’-kana’ amaen jang-lajangan,” ca’na se embu’na Sum.
”Me’ badha se
katonon paleng? Ja’ okossa ngebbul kose kadi ka’dhissa’, celleng calemot,” se
lakena Sum nambai sambi ngabas ka bara’ dhaja.
”Palengan
Juhari ngobbar rombu, ” Mahmo nyaot.
”Ta’ kera kadi
ka’dhissa’ okossa manabi coma rombu se eobbar. Paleng me’ badha barung se
katonon,” ca’na Sum.
”Dina ra la
maske apa se katonon ja’ mo’-emo’. Bila
ba’na se olleya natta’ mon gun coma ngabas okos malolo,” saodda Mahmo.
”Mak, ma’ ate
kaula ta’ nyaman gi?” ca’na Sum ngoca’ on-laon ka lakena.
”Bula enggi
jugan, Le’.”
”Kaula
palemana ka adha’ gi, Mak?”
”Enggi,”
saodda lakena.
”Dha’emma’a la
ba’na, Sum?” se embu’na atanya baktona Sum manjeng.
”Palemana,
Bu’, nengguwa me’ badha ponapa e bara’ dhaja.”
”Natta’ olle
sabungka la moleya,” ca’na embu’na, sambi ngabas ka ana’na se ajalan ka bara’
dhaja. Lebat jalan kene’, tabun se mesa settong teggal ban teggal se laen.
”Sambi ma’ ce’
emo’na ka okos ra? Ja’ ta’ kera e bengko keya se katonon,” se Mahmo nyaot keya.
”Ta’ e bengko
me’ e tatangga, Pa’.”
”La dina ra
mon gunna coma tatangga se katonon. Obus la obus,” Sum coma bisa ngosap dhadha
ngedhing oca’na eppa’na. Polana, la daddi babategga Mahmo se ta’ parduli ka
oreng laen. Ma’ sampe’ ka oreng laen se parduliya, ja’ ka taretanna dibi’ ta’
parduli.
Maske ta’
ebagi ban Mahmo, Sum paggun mole abareng lakena.
Are terros
nyellem ka bara’. Ta’ abit pole, Mahmo ban binena noro’ mole keya. Neng e
jalan, Sum atemmo tatanggana se anyama Sunni.
”Ceppeddi
mole, Le’!” ca’na se Sunni sambi nyengceng sarong. Sunni ru-kaburu padhana
badha se nabang.
”Badha apa,
Buk?”
”Dhaporra
ba’na tadha’ sakale’. Katonon. Sateya alatlat ka bengkona se bara’anna.”
Ta’ mekker
pole, Sum laju berka’. Bariya keya lakena. Bakto nangale apoy alatlat ka
bengkona, Sum enga’ ja’ ana’na badha e dhalem. Ana’na se gi’ omor tello taon
tedhung. Sum alonca’a ka apoy. Tape ecegga ban oreng.
Apoy
lat-ngoncelat, ngolap. Barang se badha dhalem dhapor ban romana Mahmo daddi
sasaran. Akello’, rabbang daddi mardha. Sabadhana barang nyonyor tadha’ se
teggu.
”Nisa, sang
ana’ badha e dhalem!” Sum acerreng pas kalengnger. Saellana tao ja’ badha
ana’na Sum e dhalem, reng-oreng buru gipo kaangguy maso’ ka dhalem.
”Sapa se
ngobbar sang bengko? Sapa?” Se Mahmo temmo badha e jadhiya keya. Lalake’ se ta’
parduli ka oreng laen jareya reng-cerrengan. Ngabas bengkona katonon, Mahmo ta’
bisa neng-enneng. Tape, tadha’ se bisa esalameddagi. Kabbi la daddi mardha.
Bakal daddi abu, rata ban tana.
”Tadha’ oreng
ngobbar, Man. Tape taobbar dibi’,” Juhari se badha e seddi’anna nyaot.
”Ta’ kera
taobbar mon tadha’ se nyolet apoy. Paleng ba’na gella’ se atana’, apoyya ta’
epate’e,” Mahmo noding ka binena se nabang dhari teggal.
”Panjennengngan
ma’ nyala’agi kaula? Kan
panjennengngan se makon badan kaula duli ngereng ka teggal? Banne salana badan kaula
manabi loppa ta’ mate’e apoy,” embu’na Sum nyaot. Sowarana ga’-tapelga’ polana
ngangsor.
”Se la sala
nyaot gi’an!” Mahmo ta’ narema. Sowarana sajan ranyeng.
”Samangken
banne baktona nyare pasera se sala, Man. Paneka ampon daddi bagiyanna
panjennengngan sakaluwarga. Ngereng same-same patennang. Se penting orengnga padha salamet.”
”Baramma
engko’ bisa tennang, Cong? Bengko ban essena la tadha’ sakale.”
”Panjennengngan
ganeka coma dunnya se tadha’, Man. Mon etembang ka oreng-oreng se kellem noro’
Kapal Jabal Nur, aneka tadha’ napana.”
”Sang kompoy
baramma?”
”Alhamdulillah
kompoyya panjennengngan salamet. Samangken badha e compo’na kaula asareng Le’
Sum.”
E bengkona
Juhari, Sum apangrasa ja’ musiba se teba ka kaluwargana aropa’agi okoman dhari
Allah. Okoman dha’ keluwargana se molae sabban ta’ parduli ka oreng laen. Ta’
parduli ka musibana oreng laen.
Sateya bila la
kaluwargana dibi’ se ecapo’ musiba tadha’ oreng se dhateng kaangguy nolonge
nyalammeddagi essena romana. Tamaso’ emmas ban pessena tadha’ se ekennenga
asak. Padha obus kakabbi ekakan apoy.
Tape, Mahmo
paggun ta’ apangrasa. Mahmo paggun nyala’agi binena. Mahmo arassa musiba reya
teba ka keluwargana karana kasala’anna binena se korang te-ngate. Ca’na Mahmo,
binena se korang ngastete e baktona atana’ sabellunna mangkat ka teggal. (*)
Carpan eattas epetthek dari Jawa Pos Radar Madura eccaban Ahad, 13 September 2015.
Tidak ada komentar:
Posting Komentar