Lukman Hakim AG. |
SATERROSSEPON, oca’ sambadan monggu
dha’ ka oreng seppo. Akadi, /pa’/ (dhari asal oca’ /eppa’/) otaba /ma/ (dhari oca’ /rama/), /ma’/ (dhari oca’ /mama’/), tor /i’/ (dhari oca’ /ai’/). Ca’-oca’
paneka eguna’agu monggu ana’
se ngolok oreng towa lake’na. Kaangguy nyambat otaba ngolok oreng towa bine’
badha oca’, akadi /ma’/ (dhari oca’ /emma’/), /bu’/ (dhari oca’ /embu’/), tor /bu/ (dhari oca’ /ebu’/).
Dhari pan-saponapan oca’ sambadan otaba ologan
monggu dha’ ka oreng towa, se paleng lumra enggi paneka /pa’/ (eppa’) sareng /ma’/ (emma’). Sabatara laenna, /i’/ (ai’) tor /bu’/ (embu’, ebu’) rangrang. Mala, e settong kampong,
badha se nyambat otaba ngolok ka oreng towa lake’na kalaban oca’ /ke/ (kae), maske saongguna oreng se ekasareng akandha
paneka banne oreng seppona rama otaba ebuna.
Parlo ekaonenge, panolesan /mak/ (emmak) sareng /ma’/ (emma’) paneka ja’
kantos taporop. Sabab, ma’naepon jugan ta’
padha. Manabi /mak/ (emmak) paneka gadhuwan arte taretan
lake’ se atowa’an otaba laen oca’na /kaka’. Manabi /ma’/ (emma’) paneka arteepon oreng towa bine’.
Oca’ se parlo ebida’agi panolesannepon enggi paneka oca’ /buk/ (embuk) sareng /bu’/ (embu’). Oca’ /buk/ (embuk) paneka gadhuwan
arte taretan bine’ se atowa’an. Manabi /bu’/ (embu’) paneka oreng towa bine’ otaba oca’ laen dhari /ma’/ (emma’).
Oca’ /pa’/ tor /ma’/ ropana jugan ampon ngalame ma’na se langkong
lebar. Oca’ /pa’/ tor /ma’/ se sabellunna coma ama’na oreng towa lake’ sareng oreng towa bine, daddi
lebbi lebar kalaban ekoca’agi otaba epangalok dha’ ka oreng laen se
ra-kera saomoran sareng oreng towana dibi’. Nangeng, ta’ kose seppo akadi kae-nyae tor ta’ kose ngodha padhana sareng aba’na otaba ale’na.
Oca’ /pa’/ tor oca’ /bu’/ jugan ekoca’agi monggu dha’ ka oreng se ngembane pakon
otaba gadhuwan pangkat se patot ehormat. Akadi /Pa’ Kalebun/, /Pa’ Camat/, /Pa’ Bupati/, /Bu Carek/, /Bu Camat/, tor en-laenna. Nangeng, parlo ekagali, oca’ /pa’/ sareng /bu/ paneka lebbi ekarassa menangka oca’ serrebban dhari basa Indonesia. Enggi paneka /bapa’/ (bapak) tor /ibu/ kalaban noro’ jila
Madura (eppa’ tor ebu).
Kaangguy ngolok majadhi’ menangka taretanna oreng towa, enggi paneka kalaban oca’ sambatan /man/ (dhari oca’ /paman/), /bi’/ (dhari oca’ /bibbi/’), tor /ba’/ (dhari oca’ /oba’/). Oca’ /man/ tor /bi’/ eguna’agi monggu
ponakan dha’ ka majadhi’ otaba ale’na oreng towa dhuwa’.
Oca’ /man/ eguna’agi dha’ ale’ lake’na eppa’ otaba emma’. Sambadan
/bi’/ eguna’agi kaangguy ngolok ale’
bine’na oreng towa dhuwa’. Oca’
/ba’/ eguna’agi kaangguy ngolok majadhi’ se
atowa’an dhari oreng towa dhuwa’ otaba kaka’ otaba ebugga oreng towa dhuwa’.
Nengeng, salaen /man/ tor /bi’/, oreng Madura badha jugan se ngolok
majadhi’na kalaban oca’ sambadan /li’/ (dhari oca’ /elli/’) tor oca’ /nom/ (dhari oca’ /anom/. Dhuwa’ oca’ sambadan
paneka kapprana ekoca’agi otaba eguna’agi monggu ponakan dha’ ka majadhi’na se
paleng ngodha. Badha juga se nyambad
kalaban oca’ /ten/ dhari oca’ /enten/ dha’ ka bibbi’.
Bisa jugan, eguna’agi karana karakeddanna
anggebban antara ponakan sareng majadhi’na kasebbut. Sae najdhi’ asli (tarenanna oreng towa dhuwa’) otaba majadhi’ pon-popon. Sabab,
majadhi’ paneka cem-macemma. Akadi, majadhi’ sapopo, majadhi dhupopo, majadhi’ tello polo sareng saterrossepon.
Tidak ada komentar:
Posting Komentar